Атақты ресейлік футбол комментаторы Александр Елагин 2026 жылғы ӘЧ іріктеу кезеңінде Қазақстан құрамасының Уэльспен сырт алаңдағы матчта жеңілу себептеріне тоқталды.
"Ашық айту керек, Қазақстан құрамасы ойсырай жеңіледі деген үрейлер орындалмады. "Шайтан онша қорқынышты емес екен" деген сөз дәл осы жағдайға сай келеді. Әли Әлиев өте жақсы команда жасақтаған. Қазақстан құрамасы сабырмен, асығыссыз, артық абыржусыз ойнады — бұл қорғанысқа да, жалпы командалық ойынға да қатысты, — деді Елагин.
"Уэльс допқа көбірек ие болғаны заңды. Себебі өз алаңында ойнады. Бірақ Қазақстан өткізген голдар жанкүйерлер үшін өте өкінішті. Алғашқы голда Тағыберген оң қапталдағы шабуылдан кейін допты дер кезінде аластатпағаны — қателік. Егер капитан допты бірден теуіп жібергенде гол болмас еді. Ол сәл кідіріп қалды, ал валлийлік ойыншылар бірден қайтадан шабуылға көшіп, рикошеттен кейін доп қақпаға кірді.
"Қазақстан құрамасының пайдасына берілген пенальти — 100 пайыз әділ шешім болды. Доп валлийлік қорғаушының қолына тиген. Өкінішке қарай Тағыберген әлсіз соққы жасады. Ал екінші таймның алғашқы минутында Заруцкий тарапынан өрескел қателік кетті. Ол допты ойынға дұрыс қоспай, гол өткізіп алды. Дегенмен кейін Заруцкий екі қауіпті соққыны қайтарды, әсіресе Джордан Джеймстің соққысын. Үшінші гол – бұл таза концентрацияның жоғалуы. Әли Әлиев қорғаныс шебін қайта қарастыруы керек. Себебі, аздаған босаңсу бірден голмен жазаланады. Футбол – қатал, бірақ әділетті", — деп түйіндеді Елагин.
Еске сала кетейік, Қазақстан құрамасы 2026 жылғы әлем чемпионатына іріктеу турнирінің алғашқы турында Уэльс құрамасынан 3:1 есебімен жеңілді. Кездесу Кардифф қаласында өтті.
