Ағылшындық "Манчестер Сити" және Өзбекстан құрамасының қорғаушысы Абдукодир Хусанов туған жерінде тосын жағдайға тап болды. Әлеуметтік желілерде таралған бейнежазбада 21 жастағы футболшының бір жанкүйердің өтінішінен бас тартқаны көрініс тапқан.
Оқиға барысында бір топ жас жігіт Хусанов отырған көлікке жақындап, қолтаңба сұрайды. Қорғаушы көпшіліктің өтінішін орындап, футболкаларға қолтаңба беріп жатқанымен, бір жанкүйерге қол қоюдан үзілді-кесілді бас тартты. Себебі — жанкүйер қолтаңбаны мадридтік "Реал" футболкасына сұраған. Айта кетейік, дәл осы клуб Хусанов пен оның командасын Чемпиондар лигасынан жарыстан шығарған болатын.
Футболшының бұл әрекеті желіде қызу талқыланып жатыр. Кейбір ақпарат көздері оның өзге клубтардың атрибутикасына қол қоюына келісімшарттық шектеулер болуы мүмкін екенін айтқанымен, бұл мәлімет ресми түрде расталмады.
Қазір Абдукодир Хусанов Өзбекстан ұлттық құрамасының сапында. 21 наурыз күні ол Қырғызстанға қарсы өткен 2026 жылғы әлем чемпионатының іріктеу ойынында (1:0) отандастарына жеңіс әкелуге көмектесті.
Ал 25 наурызда өзбекстандықтар сырт алаңда Иран құрамасына қарсы маңызды матч өткізеді.
