Ыстамбұлда өткен Түркия чемпионатының 29-турында "Бешікташ" өз алаңында турнирдің басты фавориті — "Галатасарайды" 2:1 есебімен жеңіп, үлкен сенсация жасады.
Ойынның 23-минутында Рафа Силва есеп ашып, "Бешікташты" алға шығарды. Арада көп уақыт өтпей-ақ, 36-минутта Пшемыслав Франковски қызыл қағаз алып, "Галатасарай" бір ойыншыға кем қалды. Дегенмен қонақтар тайм соңында таразы басын теңестіріп үлгерді. 45-минутта Лукас Торрейра гол соқты.
Үзілістен кейін "Бешікташ" шабуылды үдетіп, 66-минутта Жедсон Фернандештің голы арқасында қайта алға шықты. Қосымша уақытта алаңдағы ойыншылар саны теңестірілді — Семих Кылычсой алаңнан қуылды (90+6 минут).
Айта кетейік, қазақстандық жартылай қорғаушы Бахтиер Зайнутдинов бұл матчта жарақатына байланысты алаңға шыққан жоқ.
Бұл жеңістен кейін "Бешікташ" 47 ұпаймен Түркия Суперлигасында төртінші орынды сақтап қалды. Ал "Галатасарай" жеңіліске қарамастан 71 ұпаймен турнир кестесінде көш бастап тұр.
