Петропавлдағы "Қарасай" стадионында қайта жөндеу жұмыстары жалғасып жатыр. Нысан "Қызылжар" футбол клубының ресми алаңы. Жөндеу аяқталған соң стадион УЕФА-ның үшінші санат талаптарына сай болады.
“Петропавл жаңалықтары” ақпараттық парақшасы “Қарасай” стадионының жаңартылып жатқан бейнежазбасын өз парақшасында жариялады. Дронмен түсірілген видеода стадионның жаңа бейнесі анық байқалады — трибуналар ақ-қызыл түстерге боялған, ал спортшыларға арналған кіреберіс стадионның ортасына ауыстырылған.
Үшінші кезеңге қатысты жобалық жұмыстар биыл аяқталады деп жоспарланған. Ал жазда трибунаның екінші жағы жөнделеді. Жаңа үлгі стадионды халықаралық ойындарға лайық етіп жасақтауға бағытталған.
Жаңартылған “Қарасай” стадионы УЕФА-ның үшінші категориясы талаптарына сай келеді. Бұл дегеніміз — енді мұнда халықаралық ойындарды өткізуге болады, ал “Қызылжар” клубы жаңа деңгейге көтерілуге мүмкіндік алады.
Қайта жөндеу жұмыстары аяқталғанша “Қызылжар” футбол клубы өз алаңындағы матчтарын Қостанайдағы ”Тобыл Аренада” өткізіп жатыр. Команда Петропавлға 2025 жылдың мамыр айының соңына дейін оралмайды.
