"Барыс" хоккей клубында басшылық ауысқаны туралы жаңалықтардан кейін Олег Болякиннің қайта оралуы мүмкін деген болжамдар желіде қызу талқыланып жатыр. Бірақ ұлттық құраманың бас бапкері бұл мәселеге қатысты нақты мәлімдеме жасады.
Қазақстан хоккейінің тәжірибелі маманы, ұлттық құраманың қазіргі бас бапкері Олег Болякин өзіне ешқандай ресми ұсыныс түспегенін айтты:
“Жоғарыда басшылық бар — министр, басқарма жетекшілері. Кімді лайық деп санаса, сол тағайындалады”, — деді Болякин.
Сонымен қатар ол егер ұсыныс болса, жауапкершіліктен қашпайтынын анық білдірді.
“Мен – солдатпын. Айтса, жұмыс істеймін. Ең бастысы – елімнің игілігі үшін қызмет ету. Коньки ки десеңдер – киемін, жұмыс істе десеңдер – істеймін”, — деді ол.
Олег Болякин бұған дейін де “Барыс” клубында бас бапкер және бас менеджер қызметін қатар атқарғанын еске түсірді. Алайда, оның айтуынша, сол кезеңде барлық жоспарларды жүзеге асыруға уақыт жетпеген.
“Бір жыл – үлкен өзгерістер енгізуге жеткіліксіз. Бірақ бұл тәжірибе мен үшін өте құнды болды”, — деп атап өтті ол.
Маман қазіргі таңда басты назарын Қазақстан құрамасының дайындығына аударып отырғанын айтты.
“Қазір ең маңыздысы – ұлттық құраманы дайындау. Ел құрамасының мүддесі мен үшін әрқашан бірінші орында”, — деп түйіндеді сөзін Болякин.
