TikTok желісінде жарияланған бейнежазбада Астанадағы "Қазақстан" спорт сарайының сүріліп жатқаны көрсетілген. Бұл нысан бір кездері "Барыс" хоккей клубының басты алаңы болған
Астанадағы Қажымұқан көшесінде орналасқан спорт кешені 2001 жылы пайдалануға берілген. 2015 жылға дейін "Барыс" ХК дәл осы жерде өз матчтарын өткізіп келген.
Кешеннің сыймдылығы 5 500 адамға есептелген. Хоккейден бөлек, жүзу, жекпе-жек спорт түрлері, концерттер мен фестивальдер үшін де пайдаланылған.
TikTok платформасына жүктелген бейнежазбада сарайдың толығымен бұзылып жатқаны бейнеленген. Видео желіде кеңінен таралып, көп қаралым жинаған.
Көптеген пікір қалдырушылар "Барыстың" да осындай тағдырға тап болуы мүмкін бе? деген алаңдаушылықтарын білдіруде. Себебі елордалық клубтың инфрақұрылымдық болашағы бүгінде нақты айқын емес.
"Барыс" 2015 жылдан бері "Барыс Аренада" ойнап жүргенімен бұрынғы мұзайдынның сүрілуі жанкүйерлер үшін символдық мәнге ие. Бұл жағдай елордалық спорттың даму стратегиясына қатысты сұрақтар туындатып отыр.
