Ғалым Мәмбеталиев "Барыс" хоккей клубының бас бапкері қызметінде қалуы мүмкін.
Бұл ақпаратты спортқа маманданған Instagram парақшасы "Головой Об Лед" жариялады. Командада басшылық ауысқанымен маманның орнын сақтап қалу себептері белгілі бола бастады.
Ақпарат көзінің хабарлауынша, Мәмбеталиевтің клубпен жасасқан келісімшарты ұзақ мерзімді, әрі оның шарттарын бұзу "Барысқа" кемінде 200 миллион теңге көлемінде өтемақы төлеуді міндеттейді:
"Біз Ғалым Мәмбеталиевтің ҚХЛ-дегі ең аз жалақы алатын бапкерлердің бірі екенін білеміз. Алайда оның өзі 10 миллион рубль немесе шамамен 60 миллион теңге. Енді оны жұмыстан босатса, клуб елеулі өтемақы төлеуге мәжбүр болады. Жаңа басшылық бұған бара қояды деу қиын, себебі "Барыстың" бюджеті өзіңіз білесіз, тығырықта", – делінген дереккөз хабарламасында.
Бұл тұрғыда Ғалым Мәмбеталиевтің бапкерлік қызметте қалуы қаржылық тұрғыдан да, клуб тұрақтылығы үшін де орынды шешім көрінеді. Бірақ ол бас бапкер болып қала ма, әлде "көлеңкелі" рөлге ауыса ма — бұл жағы әлі нақтыланбаған.
Жуырда Сәкен Мұсайбеков "Барыстың" жаңа бас директоры болып тағайындалды. Ол сонымен қатар Қазақстандық хоккей федерациясының бас директоры және Ұлттық Олимпиадалық комитеттің қысқы спорт түрлері бойынша вице-президенті қызметтерін де қоса атқарады.
Мұсайбековтің келуімен бірге клубтағы кадрлық және стратегия бағыттарында бірқатар өзгерістер болуы мүмкін.
"Барыс" үшін өткен маусым көңіл көншітпеді. Клуб ҚХЛ-дегі ең соңғы орынды иеленіп, 68 матчта небәрі 35 ұпай жинады. Бұл көрсеткіш команданың қазіргі жағдайының қаншалықты күрделі екенін аңғартады.
