17 жасар Богдан Залевский көкшетаулық "Арлан" сапында өнер көрсетеді.
Астаналық «Барыс» хоккей клубы құрамын жас шабуылшы Богдан Залевскиймен толықтыруы мүмкін. Бұл туралы «Головой Об Лед» Telegram-арнасы хабарлады.
Мәліметке сәйкес, «Барыс» клубы Көкшетау қаласындағы БЖСМ (ДЮСШ) түлегі, 17 жастағы «Арлан» командасының шабуылшысы Богдан Залевскийге назар аударған.
Астанада ойыншыны қаңтар айында қатарға қосуды жоспарлап отыр. Жас хоккейшіге өзін «Снежные Барсы» мен «Номад» командаларының сапында көрсетуге мүмкіндік беріледі. Ал одан кейін оны негізгі құрамның жаттығуларына шақыру да мүмкін.
Өткен маусымда «Жастар» лигасында Көкшетау командасының сапында өнер көрсеткен Богдан Залевский 29 ұпай (13 шайба + 16 нәтижелі пас) жинаған.
Еске сала кетейік, бүгін «Барыс» Астанада ҚХЛ аясында Екатеринбургтің «Автомобилист» командасын қабылдайды. Кездесу Қазақстан уақытымен 19:30-да басталып, «Qazsport» телеарнасынан тікелей эфирде көрсетіледі.
