"Қайтадан мұзға шыққым келеді": Боченски "Барыс Аренаға" оралғандағы әсерін айтты
"Барыстың" бұрынғы капитаны Брэндон Боченски таныс мұз айдынына оралу хоккей формасын қайта киюге деген құлшынысын оятқанын жеткізді.
"Әлі де ойнай алатындай сезінемін"
Бұрынғы капитан үшін "Барыстың" аренасына келу ойыншы кезіндегі сезімдерін қайта жаңғыртқан. Матч алдындағы дайындық пен мұзға шығу сәттері есіне түскен шабуылшы қуанышын жасырмады.
"Мұнда уақыт тоқтап қалғандай әсерде боласың. Бірден форманы киіп, матчқа дайындалғың келеді. Өзімді әлі де ойнай алатындай сезінемін. Қалай болғанда да, осында қайта келгеніме өте қуаныштымын" — деді Боченски.
"Барыс" тарихында із қалдырған капитан
Брэндон Боченски астаналық команданың сапында 2010–2017 жылдары өнер көрсетті. Бір жылдық үзілістен кейін клубқа қайта қосылып, 2018/2019 маусымын өткізді.
Құрлықтық хоккей лигасындағы сегіз маусымда шабуылшының еншісіне мынадай көрсеткіштер жазылды:
- 455 матч;
- 179 гол;
- 265 нәтижелі пас;
- 444 ұпай.
Боченски "Барыс" тарихындағы ең көп ұпай жинаған және ең көп нәтижелі пас берген ойыншы мәртебесін әлі де сақтап келеді. Ол клуб капитаны болумен қатар, Қазақстан ұлттық құрамасының намысын да қорғады.