Зәмзәгүл сондай-ақ дзюдошылар да бір күні футболшылардай айлық алатынына үміт білдірді.
Қазақстандық дзюдошы, спорт шебері Зәмзәгүл Файзолланова футболшылар мен дзюдо шеберлерінің жалақысын салыстырып, шынайы таңданысын жасырмады. Ол футболшылардың 20 миллион теңгеге дейін айлық алатынын естігенде «шок» күйге түскенін айтты. Бұл туралы aladop.kz хабарлады.
«Дзюдошының орташа жалақысы – 300 мың теңге. Футбол ойнай алмайтыныма қатты өкінемін (күледі). Бір күні дзюдошылар да футболшылардай айлық алады деп үміттенемін!» – деді ол Kazfootball.kz порталына берген сұхбатында.
Файзолланова сондай-ақ, футболшыларға қарата:
«Футболшы мырзалар, енді осындай ақшаны (20 млн теңге) адал ақтаңыздар! Жапонияда дзюдошылар футболшылармен спарринг өткізеді, біздікілерді де жіберсін – бір-екі әдіс көрсетіп жіберейік», – деп әзіл қосты.
Бұл пікір жуырда қоғамда қызу талқыға түскен бір жайтпен байланысты. Шымкент қаласының әкімі «Ордабасы» клубының бұрынғы жартылай қорғаушысы Асхат Тағыбергеннің жалақысы – айына 20 миллион теңге екенін жария еткен еді. Бұл мәлімдемеден соң футболшы командадан кеткен болатын.
