Талдықорғандық волейболшы қыздар жеңісті жолын жалғастырып келеді. Филиппиннің Пасиг қаласында өтіп жатқан әйелдер арасындағы Азия чемпиондар лигасында "Жетісу" командасы топтық кезеңнің екінші ойынын сенімді жеңіспен аяқтады.
Қазақстан чемпиондары бұл жолы Иорданияның “Әл-Наср” клубымен күш сынасты. Кездесу толық “Жетісудың” бақылауында өтті. Үш партия қорытындысы: 3:0 (25:10, 25:15, 25:11).
Бұл матчта волейболшылар ойынның барлық компонентінде басым түсіп, өз шеберлігін толық көрсетті. Әсіресе шабуылдағы өткірлік пен қорғаныстағы сенімділік ерекше көзге түсті.
Осы нәтижеден кейін “Жетісу” А тобының турнирлік кестесінде бірінші орынға жайғасты. Бұл оларға жарыстың келесі кезеңіне сенімді қадам жасауға мүмкіндік берді.
Турнир регламентіне сәйкес, топта алғашқы екі орынға ие болған командалар D тобының үздік екі ұжымымен (Таиланд және Филиппин клубтары) екінші топтық кезеңде кездеседі. Бұл кезеңнің қорытындысы бойынша екі үздік команда жартылай финалға жолдама алады.
