Алматыда қазақ спорт журналистикасының көрнекті тұлғасы, спорт комментаторы, тележурналист, Ақпарат саласының үздігі Амангелді Сейітхан атында шағын футболдан 4-ші республикалық турнир басталды.
Жиналғандар журналисті еске алып, жылы естеліктерімен бөлісті. “Қазақ спортының қайрағы” атанған Амангелді Сейітхан “Хабар” арнасында 20 жылдан астам уақыт қызмет етті. Бес олимпиада ойындарында хабар таратты. Футболдан әлем чемпионатын тұңғыш рет қазақ тілінде жүргізіп, спорт журналистикасының дамуына зор үлес қосты.
Аяулы азаматты еске алуға арналған байрақты бәсекеге елдің әр аймағынан бұқаралық ақпарат құралдары өкілдерінен құралған 14 команда келді.
“Амангелдінің “Жеңісті күндерде жүздескенше!” деген жарқын дауысы баршамызды желпіндіретін. Амангелдінің ең үлкен қасиеті ұлттық спорт пен әлемдік спортты біріктірді. Былай айтқанда, футбол мен көкпарды Амангелдінің бойынан бірдей табылатын. Барлығына керек сөз табатын, барлығына теңеу табатын. Амангелдіге ғана құрмет емес, бұл қазақ спортына, өмірден өтіп кеткен біздің журналистерімізге құрмет”, – деді ардагер журналист Қайнар Олжай.
