Германияның аты аңызға айналған биатлоншысы, екі дүркін Олимпиада чемпионы Лаура Дальмайер Пәкістан тауларында тас көшкініне тап болды. Оқиға 5700 метр биіктікте болған.
Спортшының серіктесі бірден құтқарушыларды шақырғанымен оқиға орнының алыс әрі қиын жер бедерінде орналасуына байланысты көмек тобы тек келесі күні таңертең жеткен. Іздестіру-құтқару жұмыстары күні бойы жалғасқан. Бірақ қараңғы түскен соң уақытша тоқтатылған.
Құтқарушылардың айтуынша, тікұшақтар да іске қосылған. Алайда Дальмайерді табу әзірге мүмкін болмаған. Іздеу шаралары таң атқанда қайта жалғасады деп жоспарлануда.
Лаура Дальмайер — биатлоннан жеті дүркін әлем чемпионы, сондай-ақ екі мәрте Олимпиада алтынын жеңіп алған спортшы. Ол тек 25 жасында кәсіби мансабын аяқтағанымен белсенді өмір салтын жалғастырған.
Спорттық мансабынан кейін неміс спортшысы альпинизммен айналысып, тау құтқару қызметінде де жұмыс істеген.
