Ерлерден озған әйелдер: "Гиннес" ерекше жетістіктерді жариялады

Халықаралық әйелдер күні қарсаңында Гиннестің рекордтар кітабы әйелдердің ерекше жетістіктеріне арналған арнайы жинақ жариялады. Онда тек рекорд орнатып қана қоймай, ерлердің нәтижелерінен асып түскен әйелдердің әсерлі оқиғалары қамтылған. Бұл туралы kursiv.media хабарлады. 

Әлемді 263 күнде велосипедпен айналған

Британиялық спортшылар Рэйчел Марсден мен Кэтрин Диксон “Алиса” атты тандем-велосипедпен жер шарын 263 күнде айналып өтті.

Бұл көрсеткіш ерлердің бұрынғы рекорды — 281 күннен әлдеқайда жылдам. Сапар барысында олар қайырымдылық мақсатында ондаған мың фунт стерлинг жинап, табандылық пен командалық жұмыстың маңызын дәлелдеді.

200 күн қатарынан ультрамарафон

Америкалық жүгіруші Кэндис Бёрт бастапқыда қатарынан 100 ультрамарафон жүгіріп өтуді жоспарлаған. Алайда ол тоқтамай, нәтижесінде 200 күн бойы күн сайын ультрақашықтыққа жүгіріп шықты.

Салыстыру үшін, бұл бағыттағы ерлердің рекорды 80 күн ғана. Бёрттің жетістігі төзімділік пен тәртіптің символына айналды.

Ультрамарафондағы тарихи жетістік

Америкалық спортшы Кортни Дауолтер небәрі 70 күннің ішінде ең беделді үш ультрамарафонды жеңіп алды:

• Western States
• Hardrock
• Ultra-Trail du Mont-Blanc

Бұл жарыстардың жалпы ұзындығы 500 шақырымнан асады, ал биіктік айырмасы он Эверестке тең.

10 шақырымдық хула-хуп рекорды

Канадалық Хизер Брей ерекше рекорд орнатты. Ол белтемірді (хула-хуп) тоқтатпай айналдыра отырып 10 шақырымды 52 минутта жүгіріп өтті.

Ал ерлер арасындағы көрсеткіш — 1 сағат 25 минут.

Кейін ол Элвис костюмін киіп, марафонды 3 сағат 13 минутта аяқтап, тағы бір ерекше жетістікке жетті.

Әлем шыңдарын бағындырған альпинист

Мексикалық альпинист Виридиана Альварес Чавес бірнеше рекорд орнатқан:

• әлемдегі ең биік үш шыңды ең жылдам бағындырған әйел;
• барлық 14 сегіз мыңдық тауды және “Жеті шыңды” бағындырған алғашқы әйел;
• Суринамдағы Джулианатоп шыңына шығу рекордының иесі.

Ол қарапайым кеңсе қызметкерінен әлемдік рекордшыға айналып, Гиннестің Құрмет залына енді.

Тағы бірнеше рекорд

Гиннес жинағында әйелдердің тағы бірнеше ерекше жетістігі атап өтілген:

• Андреа М. (Ұлыбритания) – үш минутта хула-хупты 453 рет айналдырды (ерлерде – 290).
• Жанни Лонго-Сипрелли – тасжол велоспортынан бес рет әлем чемпионы атанды.
• Грете Вайц – марафондық мейджорларда 12 рет жеңіске жетті (Элиуд Кипчоге – 9).
• Дениз Мюллер-Коренек – велосипедпен сағатына 296 км жылдамдыққа жетті.
• Билли-Джин Кинг пен Мартина Навратилова – Уимблдонда 20 титул жеңіп алды (ерлерде – 13).
• Элизабет Фрай – 60 жасында «Мұхиттық жетілікті» бағындырған ең егде адам атанды.