"Астана" шабандозы Түркиядағы Президенттік тур кезеңінде топ жарды
Қазақстандық XDS Astana Team командасының италиялық велошабандозы Давиде Баллерини Түркиядағы Президенттік турдың жетінші кезеңінде үздік атанды. Анталья — Анталья бағыты бойынша өткен 150 шақырымдық жарыс спринтерлік мәремен аяқталды.
Спринтте қарсыластарынан озды
Пелотон жетінші кезеңде Антальядан шығып, қайта сол қалада мәреге жетті. 150 шақырымға созылған бәсекенің тағдыры соңғы метрлердегі спринтте шешілді.
Давиде Баллерини шешуші сәтте жоғары жылдамдық көрсетіп, қарсыластарын артта қалдырды. Ол кезеңді 3 сағат 19 минут 41 секундта аяқтады.
Екінші орынды ATT Investments командасының өкілі Марцели Богуславски иеленсе, үздік үштікті Team Flanders-Baloise шабандозы Том Краббе түйіндеді.
“Астана” шабандоздарының кезеңдегі нәтижесі
XDS Astana Team сапындағы негізгі велошабандоздар көшбасшылар тобында мәреге жетіп, жеңімпазбен бірдей уақыт алды.
7-кезең қорытындысы бойынша “Астана” шабандоздары:
Давиде Баллерини — 1-орын, 03:19:41
Алессио Делле Ведове — 47-орын
Хенок Мулубрхан — 50-орын
Маттео Скалько — 64-орын
Лев Гонов — 73-орын
Даррен ван Беккум — 133-орын
Николя Винокуров — 144-орын
Жалпы есепте кім көш бастап тұр?
Жеті кезеңнен кейін жалпы классификацияда Caja Rural-Seguros RGA командасының шабандозы Себастьян Бервик көш бастап келеді. Оның нәтижесі — 24:22:44.
Екінші орында Equipo Kern Pharma өкілі Иван Соса тұр. Ол көшбасшыдан 5 секундқа қалып келеді. Үшінші сатыда Solution Tech-NIPPO-Rali спортшысы Камиль Боннё орналасқан. Оның артта қалуы — 59 секунд.
Қазақстандық команда сапынан жалпы есептегі ең үздік нәтиже Хенок Мулубрханға тиесілі. Ол 8-орында келеді және көшбасшыдан 1 минут 53 секундқа қалып отыр.
Жалпы классификациядағы “Астана” шабандоздары:
Хенок Мулубрхан — 8-орын, +1:53
Маттео Скалько — 11-орын, +2:42
Николя Винокуров — 12-орын, +2:43
Даррен ван Беккум — 24-орын, +6:12
Лев Гонов — 69-орын, +40:31
Давиде Баллерини — 71-орын, +41:19
Алессио Делле Ведове — 94-орын, +58:01