Қазақстанда үстел теннисінен әлем чемпионаты өтеді

Қазақстанға ITTF туы ресми түрде табысталды

Лондонда командалық әлем чемпионаты аясында Қазақстанға Халықаралық үстел теннисі федерациясының туы ресми түрде тапсырылды. Бұл рәсім еліміздің әлемдік біріншілікке дайындық кезеңінің басталғанын білдіреді.

Қазақстан 2027 жылғы әлем чемпионатын өткізу құқығын 2025 жылы ITTF Бас ассамблеясының шешімімен жеңіп алған. Финалдық дауыс беру кезінде Қазақстан 111 дауыс жинап, Францияны басып озды.

Әлем чемпионатына қанша адам қатысады?

Алдын ала мәлімет бойынша Астанада өтетін әлем чемпионатына шамамен 1250 адам қатысады. Олардың қатарында:

• спортшылар;
• жаттықтырушылар;
• төрешілер;
• халықаралық делегаттар;
• спорт ұйымдарының өкілдері бар.

Бұл Қазақстанның халықаралық спорттық беделін арттырып қана қоймай, елдегі үстел теннисінің дамуына жаңа серпін береді.

Қазақстанда үстел теннисі қалай дамып жатыр?

Әлем чемпионатын өткізу құқығы елдегі үстел теннисін жүйелі дамыту жұмысының нәтижесі саналады. Қазір Қазақстанда бұл спорт түрімен тұрақты түрде 260 мыңнан астам адам айналысады.

Олардың 10 мыңнан астамы кәсіби спортшы ретінде тіркелген. Республика бойынша 12 мамандандырылған үстел теннисі орталығы жұмыс істейді.

Сонымен қатар жаңа спорт орталықтарын салу және жобалау жұмыстары бірнеше қалада жүргізіліп жатыр. Атап айтқанда:

• Қостанай;
• Орал;
• Семей;
• Алматы.

Соңғы жылдары елде шамамен 30 үстел теннисі бөлімшесі және 35 арнайы зал ашылды. Аймақтар үшін 650-ден астам кәсіби теннис үстелі сатып алынған.

Бұдан бөлек “Балабақшадан үстел теннисіне” жобасы аясында мектепке дейінгі мекемелерде арнайы секциялар жұмыс істей бастады.

Халықаралық жетістіктер

Қазақстандық үстел теннисшілері соңғы жылдары халықаралық аренада да жоғары нәтиже көрсетіп жүр.

2025 жылы ұлттық құрама мүшелері халықаралық рейтингтік турнирлерде 47 медаль жеңіп алды. Ерлер құрамасы Ислам ынтымақтастығы ойындарының жеңімпазы атанды. Сонымен қатар әлем және Азия чемпионаттарында сәтті өнер көрсетті.

Қазақстан ірі халықаралық жарыстарды ұйымдастыру тәжірибесіне ие. 2024 жылы Астанада үстел теннисінен XXVII Азия чемпионаты өтті. Оған 25 елден 195 спортшы қатысты.

Бұл турнир де тарихи маңызға ие болды, себебі үстел теннисінен Азия чемпионаты алғаш рет Орталық Азия аумағында ұйымдастырылды.