Бибісара Асаубаева сүйікті шахматшысына сәттілік сыйлады
Бухаресттегі Grand Chess Tour турнирінде отандасымыз Жавохир Синдаровтың партиясына алғашқы жүріс жасады.
Қазақстандық шахматшы Бибісара Асаубаева Румыния астанасы Бухарестте өтіп жатқан беделді Superbet Chess Classic Romania турнирінде ерекше сәтке қатысып, өзбекстандық гроссмейстер Жавохир Синдаровтың партиясында символикалық алғашқы жүріс жасады. Бұл жарыс 2026 жылғы Grand Chess Tour сериясының кезеңдерінің бірі саналады.
17 мамыр күні төртінші тур алдында Бибісара Асаубаева Жавохир Синдаров пен нидерландылық гроссмейстер Аниш Гири арасындағы партияда символикалық алғашқы жүрісті орындады.
Кездесу Синдаров үшін оңай болған жоқ. Дегенмен өзбекстандық шахматшы күрделі партияны тең аяқтап, маңызды жарты ұпай еншіледі. Осыдан кейін жанкүйерлер Асаубаеваның алғашқы жүрісі оған сәттілік әкелді деп талқылай бастады.
Синдаров турнир кестесінде нешінші орында?
Қазіргі таңда Superbet Chess Classic Romania турнирінде тоғыз турдың бесеуі өтті. Жавохир Синдаров бес партиядан кейін екі ұпай жинап, турнирлік кестеде 8-орында келеді.
Екінші турда ол үндістандық Рамешбабу Прагнанандхаға есе жіберген еді. Бұл жеңіліс Синдаровтың классикалық шахматтағы 53 партияға созылған жеңіліссіз сериясын тоқтатты.
Асаубаеваның Бухарестке баруы назар аудартты
Бибісара Асаубаеваның Бухарестке барып, Жавохир Синдаровқа қолдау көрсетуі шахмат жанкүйерлері мен БАҚ назарын аударды.
Шахмат қауымдастығында екі спортшының арасындағы қарым-қатынас туралы әңгіме де жиі айтылып жүр. Бұған дейін Асаубаева Синдаровты ашық түрде "менің чемпионым" деп атаған. Сонымен қатар олардың отбасылары да жақын достық қарым-қатынасты растаған және болашақта той болуы мүмкін екенін жоққа шығармаған.
Grand Chess Tour-дегі бәсеке жалғасады
Бухаресттегі турнир әлі аяқталған жоқ. Алда тағы төрт тур бар. Синдаров үшін қалған партиялар турнирлік жағдайын жақсартуға мүмкіндік береді.
Ал Бибісара Асаубаеваның символикалық жүрісі бұл жарыстың ең көп талқыланған сәттерінің біріне айналды.