Ербол Мырзабосынов Шайдоровтың неге жалақы алмай жүргенін айтты
Бұған дейін мәнерлеп сырғанаушы Олимпиада-2026 додасындағы жеңісінен кейін жалақы алмай жүргенін, сондай-ақ медициналық бақылаудан айырылғанын айтқан еді,
Министр: "Жаңа келісімшартқа әлі қол қойылмаған"
Ербол Мырзабосынов Олимпиада ойындарынан кейін бұрынғы келісімшарт мерзімі аяқталғанын айтты. Ал наурыз айынан бастап келесі олимпиадалық циклге арналған жаңа келісім жасалуы тиіс болған.
"Михаил Шайдоров — ел мақтан тұтатын ерекше спортшы, Олимпиада чемпионы. Оның жеңісі қазақстандық мәнерлеп сырғанау және жалпы отандық спорт үшін тарихи оқиға болды. Бірақ бұл жерде бес айлық жалақы қарызы туралы сөз болып отырған жоқ. Ақпан айына дейін ол бұрынғы келісімшарт бойынша жалақы алды. Олимпиададан кейін бұл келісімшарт аяқталды. Наурыздан бастап жаңа циклге келісім жасалуы керек еді", — деді министр.
Оның айтуынша, мұндай тәртіп ұлттық құрамадағы барлық спортшыға ортақ. Бір дайындық кезеңі аяқталған соң, келесі олимпиадалық циклге жаңа келісімшарт рәсімделеді. Қазір жаңа құжатқа қол қойылмағандықтан жаңа кезең бойынша төлем жүргізуге құқықтық негіз жоқ.
Шайдоровқа тиімді шарт ұсынылған
Министр жаңа келісімшартта Шайдоровтың Олимпиада чемпионы ретіндегі мәртебесі ескерілгенін мәлімдеді. Оның сөзінше, спортшыға бұрынғыдан да жақсы жағдай қарастырылған.
"Олимпиада алтынын жеңіп алғаннан кейін Михаилдың мәртебесі өзгергені түсінікті. Сондықтан оған Олимпиада чемпионы деңгейіне сай, тиімдірек шарттары бар жаңа келісімшарт ұсынылды. Қаржыландыруды қысқарту, жағдайды нашарлату немесе ұлттық құрамадағы мәртебесін төмендету туралы әңгіме жоқ", — деді Мырзабосынов.
Бірақ келісімшартқа әлі қол қойылмаған. Министрдің айтуынша, Шайдоров құжаттағы "Міндеттемелер" бөлімімен келіспеген. Қазір тараптар ортақ заңды шешімге келе алмай отыр.
Барлық спортшыға ортақ үлгілік келісімшарт
Ербол Мырзабосынов ұлттық құрама спортшысы кәсіби міндет атқаратынын, сондықтан келісімшартта екі тараптың да жауапкершілігі болуы заңды екенін айтты.
Министрдің сөзінше, спортшы жалақы алады, оқу-жаттығу жиындарымен, медициналық қызметпен, халықаралық жарыстарға қатысу мүмкіндігімен және басқа да мемлекеттік қолдау шараларымен қамтамасыз етіледі. Сол себепті келісімшарт тек жұмыс берушінің емес, спортшының да міндеттерін қамтиды.
"Бұл Михаил Шайдоров үшін арнайы жасалған жеке келісімшарт емес. Бұл ұлттық құрама мүшелерінің барлығына қолданылатын үлгілік құжат. Қазіргі таңда мұндай келісімшартпен Олимпиада чемпиондары, Олимпиада жүлдегерлері, әлем чемпиондары және елдің басқа да жетекші спортшылары жұмыс істеп жүр. Министрлік пен Спортты дамыту дирекциясы бір спортшы үшін шарттарды бөлек өзгерте алмайды. Заң бәріне ортақ", — деді ол.
Жалақы қашан төленеді?
Министр жағдайды шешудің жолы — жаңа келісімшартқа қол қою екенін айтты. Құжат рәсімделгеннен кейін спортшының жалақысы мен дайындық процесін сүйемелдеу мәселелері реттелмек.
"Жаңа келісімшартқа қол қойылғаннан кейін Михаил соңғы үш айға тиесілі барлық төлемін толық көлемде алады. Мемлекет Олимпиада чемпионы алдындағы міндеттемелерінен бас тартпайды", — деді Мырзабосынов.
Мемлекет Шайдоровты жазалағысы келмейді
Шайдоров бұған дейін бұл жағдайды өзінің ашық ұстанымымен байланыстыруы мүмкін екенін айтқан. Министр мұндай болжамды жоққа шығарды.
"Михаил Шайдоров — біздің мақтанышымыз, қазіргі Қазақстанның ең жарқын спортшыларының бірі. Мемлекеттің мұндай спортшыны жазалау немесе оған кедергі келтіру мақсаты жоқ және болуы да мүмкін емес. Керісінше, біз оның Қазақстан атынан өнер көрсетіп, келесі маусымға және маңызды жарыстарға сәтті дайындалғанын қалаймыз", — деді министр.
Оның айтуынша, қазіргі талқыланып жатқан мәселелер тек ұйымдастырушылық және құқықтық сипатта.
Медициналық қолдауға қатысты түсініктеме
Михаил Шайдоров Олимпиададан кейін медициналық бақылаудан айырылғанын да айтқан еді. Министр бұл мәселе бойынша да түсініктеме берді.
Ербол Мырзабосыновтың сөзінше, дәрігерлер мен массажистер жекелеген спортшыларға немесе командаларға оқу-жаттығу жиындары мен халықаралық жарыстар кезінде бекітіледі. Егер Шайдоровтың бас бапкерінен оқу-жаттығу жиыны немесе жарысқа қатысу бойынша өтініш түссе, Олимпиада кезіндегідей дәрігер спортшыға жеке бекітіледі.
Сонымен қатар Шайдоровтың бапкерлер штабы жұмысын жалғастырып жатыр. Министрдің айтуынша, бас бапкер Әсем Қасанова, жеке бапкер Алексей Урманов және құрамамен жұмыс істейтін басқа да мамандар жаңа келісімшартқа қол қойған.
Олимпиада алтыны үшін сыйақы қашан беріледі?
Министр Олимпиада-2026 алтын медалі үшін мемлекеттік сыйақы төлеу маусым-шілде айларына жоспарланғанын мәлімдеді. Ол үшін бірқатар міндетті рәсімдер аяқталуы керек.
Михаил Шайдоровқа "Қазақстанның еңбек сіңірген спорт шебері" атағын беру мәселесіне қатысты да түсініктеме берілді. Министрдің айтуынша, бұл бағытта ешқандай кедергі жоқ.
"Михаил бұл атаққа өзінің тарихи нәтижесімен толық лайық. Тиісті бұйрық бұрыннан қол қойылған. Белгі мен куәлік Астанада өтетін жеке кездесуде, салтанатты жағдайда табысталады", — деді Ербол Мырзабосынов.
Бұған дейін не болған?
Еске салайық, Михаил Шайдоров журналист Тимур Балымбетовке берген сұхбатында Олимпиада-2026 жеңісінен кейін өзіне және бапкерлер штабына жалақы төлеу тоқтағанын айтқан. Сондай-ақ спортшы 1 ақпаннан бастап медициналық бақылаусыз қалғанын мәлімдеген.