Алуа Нұрман ФИДЕ рейтингінде үздік үштіктегі орнын сақтап қалды
Қазақстандық шахматшы қыздар арасындағы әлемнің ең мықты 100 шахматшысы кірген ФИДЕ рейтингінде үшінші орында қалды.
Халықаралық шахмат федерациясы 1 тамызда жасөспірім қыздар арасындағы жаңартылған әлемдік рейтингті жариялады. Бұл тізімге әлемнің ең үздік 100 шахматшысы енген.
Алуа Нұрман үшінші орында қалды
Қазақстандық Алуа Нұрман ФИДЕ рейтингінде үздік үштіктегі орнын сақтап қалды.
Оның қазіргі көрсеткіші — 2442 рейтингтік ұпай. Бұл нәтиже Нұрманды әлемдегі ең мықты жас шахматшылардың қатарына қосып отыр.
Рейтингте Алуа Нұрманнан жоғары Украина өкілі Анастасия Гнатышин мен ресейлік Анна Шухман орналасқан.
Анастасия Гнатышин 2465 ұпаймен көш бастап тұр. Анна Шухман 2443 ұпаймен екінші орында. Ал Алуа Нұрман екінші позициядан небәрі бір ғана рейтингтік ұпайға қалып келеді.
Көшбасшыдан қазақстандық шахматшыны 23 ұпай бөліп тұр.
Үздік бестікке кім енді?
ФИДЕ рейтингінің алғашқы бестігіне Украина, Ресей, Қазақстан, Өзбекстан және АҚШ шахматшылары енді.
Өзбекстан өкілі Афруза Хамдамова 2440 ұпаймен төртінші орында тұр. Ал америкалық Элис Ли 2430 рейтингтік ұпаймен бесінші сатыға жайғасты.
Қазақстаннан бес шахматшы топ-100 қатарына енді
Тамыз айындағы рейтингте Қазақстанның бес шахматшысы үздік 100 тізіміне кірді.
Амина Қайырбекова 2353 ұпаймен 13-орында тұр. Эльназ Қалиахмет 2304 ұпаймен 22-сатыға жайғасқан.
Одан кейін Зарина Нұрғалиева келеді. Оның еншісінде 2302 ұпай бар және ол рейтингте 23-орынға орналасқан.
Үздік шахматшылар қатарында Мария Холявко да бар. Ол 2217 рейтингтік ұпаймен 60-орында тұр. Осылайша Қазақстан жасөспірім қыздар арасындағы әлемдік рейтингте бірден бес шахматшымен ұсынылып отыр.