Қазақстан Азиада жарысының жетінші күнін бес медальмен аяқтады

Байдарка мен каноэден үш қола

Күннің үш медалі байдарка және каноэ есу жарыстарында тіркелді. Стелла Суханова 500 метр қашықтықтағы байдарка жарысында үшінші орын алды. Бұл оның осы Азиададағы екінші қола жүлдесі болды. Дәл осы қашықтықта ерлер арасында Дмитрий Холмогоров та үшінші нәтиже көрсетті.

Тағы бір қола жүлдені аралас каноэ-екілік бәсекесінде Сергей Емельянов пен Руфина Ысқақова иеленді. Қазақстандық жұп 500 метрлік жарыста үздік үштіктен көрінді.

Нысана көздеуден тағы бір жүлде

Оқ атудан әйелдер арасындағы 50 метр қашықтықтағы үш қалыптан винтовкамен ату сайысында Қазақстан құрамасы командалық есепте қола медаль алды. Жүлдеге Арина Малиновская, София Шульженко және Елизавета Безрукова қол жеткізді.

Семсерлесуден ерлер құрамасы үшінші орын алды

Қазақстанның ерлер құрамасы қылышпен семсерлесуден де жүлдегер атанды. Қазақстандықтар жартылай финалда Жапония құрамасына 34:45 есебімен жол беріп, турнирді үшінші орынмен аяқтады. Осылайша бұл Қазақстанның жетінші жарыс күніндегі бесінші қола жүлдесі болды.

Сабырхан мен Оралбай ширек финалға шықты

Бокс турнирінде Махмұд Сабырхан мен Нұрбек Оралбай өз жекпе-жектерінде қарсыластарын төрешілердің бірауызды шешімімен есебімен жеңіп, ширек финалға өтті. Ал Виктория Графеева жарысты аяқтады. Ол Олимпиада чемпионы Линь Юй-тинге төрешілердің бөлек шешімімен есе жіберді.

Басқа спорт түрлеріндегі нәтижелер

Жеңіл атлетикада Мария Шувалова 400 метрге жүгіруден финалда алтыншы орын алды. Ауыр атлет Бексұлтан Айтбай жарысты жетінші орынмен аяқтаса, ядро итеруде Иван Иванов тоғызыншы нәтиже көрсетті.

Жеті жарыс күнінің қорытындысы бойынша Қазақстан құрамасының еншісінде 35 медаль бар:

• 8 алтын
• 8 күміс
• 19 қола

Қазақстан жалпы есепте бесінші орынға түсті. Төртінші сатыға Өзбекстан көтерілді. Екі елдің алтын медаль саны тең болғанымен Өзбекстан күміс жүлделер саны бойынша алда тұр. Азиада-2026 жарыстары 4 қазанда аяқталады.