Қазақстан шахматшылары Тоқаевқа өтініш жолдады
Басты мақсат – Қазақстандағы шахматшыларды, бапкерлерді және балалар мен жасөспірімдер спортын жүйелі түрде қолдау.
Қазақстан әйелдер құрамасының шахматшысы Алуа Нұрман ұлттық құрама мүшелері Президент Қасым-Жомарт Тоқаевқа шахматты мемлекеттік қолдау жүйесін қайта қарау жөнінде ұсыныс жолдағанын мәлімдеді.
Спортшының айтуынша, мәселе жекелеген турнир немесе бір медальмен шектелмейді. Басты мақсат – Қазақстандағы шахматшыларды, бапкерлерді және балалар мен жасөспірімдер спортын жүйелі түрде қолдау.
"Шахматқа олимпиадалық спорт түрлерімен деңгейлес қолдау қажет"
Алуа Нұрман Instagram парақшасында шахматтың халықаралық мәртебесі мен қазақстандық спортшылардың жетістіктерін ескере отырып, мемлекеттік қаржыландыру тәсілін қайта қарауды ұсынғандарын жазды.
"Біз тек жеңістеріміз туралы ғана емес, Қазақстан шахматының болашағы үшін не істей алатынымыз туралы да айтқымыз келеді. Құрамадағы қыздармен бірге Президентке шахматты мемлекеттік қолдау тәсілін қайта қарау туралы өтініш жасадық. Бұл мәселе бір медаль немесе бір турнирден әлдеқайда ауқымды.
Спортшыларымыздың жетістіктері мен шахматтың халықаралық мәртебесін ескере отырып, мемлекеттік қаржыландыру тәсілін қайта қарап, олимпиадалық спорт түрлерімен салыстырмалы деңгейде қолдау қарастыруды сұрадық. Бұл балалар мен жасөспірімдер шахматын, ұлттық құрамаларды және бапкерлерді қолдауға мүмкіндік береді. Шахмат – жай ғана спорт емес. Бұл Қазақстанның интеллектуалдық болашағына салынған инвестиция", – деп жазды Нұрман.
Қазақстан құрамасы Олимпиадада күміс алды
Самарқандта өткен 46-Дүниежүзілік шахмат олимпиадасында Қазақстан әйелдер құрамасы күміс медаль жеңіп алды.
Ұлттық құрама турнир бойы бірде-бір матчта жеңілген жоқ. Осы жарыстан кейін Алуа Нұрман спортшыларға мемлекеттік сыйақы қарастырылмағанын хабарлаған. Себебі Дүниежүзілік шахмат олимпиадасы Туризм және спорт министрлігі төлем тағайындайтын ресми жарыстар тізіміне енбеген.
Кейін бұл жағдайды профильді министрлік пен Қазақстан шахмат федерациясы түсіндіріп, қолданыстағы заңнама бойынша мұндай мемлекеттік бонус қарастырылмағанын мәлімдеген.
Неліктен шахматшыларға мемлекеттік сыйақы берілмейді?
2025 жылғы 15 сәуірде Президент қол қойған №302-VIII ҚРЗ заңына сәйкес, шахмат Қазақстандағы мемлекеттік деңгейде басымдық берілетін спорт түрлерінің тізіміне кірмейді.
Қолданыстағы жүйеде мемлекеттік қаржыландыру мен жоғары тарифтік қолдау негізінен олимпиадалық, паралимпиадалық, сурдлимпиадалық және Азия ойындарының бағдарламасына кіретін спорт түрлеріне бағытталған.
Қазақстан әйелдер құрамасының бастамасы осы тәсілді қайта қарап, шахматқа берілетін мемлекеттік қолдауды кеңейтуді көздейді.