Олимпиаданың аяқталуына екі тур қалды.
Венгрия астанасы Будапештте өтіп жатқан шахматтан 45-ші Олимпиада ойындарында Қазақстан құрамасы 9-шы турдан кейін 16 ұпаймен бірінші орынға шықты.
Тоғызыншы турда Қазақстан құрамасы басты фавориттің бірі Польшамен сынға түсіп, 2,5:1,5 есебімен басым түсті. Жеңісті командамызға Алуа Нұрман сыйлады. Ал, Бибісара Асаубаева, Меруерт Қамалиденова және Ксения Балабаева өз ойындарын тең нәтижемен аяқтады.
Осылайша, Қазақстан құрамасы тоғыз тур қорытындысы бойынша бірінші орынға шықты. Одан кейін Үндістан (15), Польша және АҚШ (әрқайсысы 14 ұпайдан) орналасқан.
Естеріңізге сала кетейік, 8-турда отандастарымыз турнир кестесінде өздерімен шамалас тұрған Францияны (2355, №13) 2,5-1,5 есебімен жеңген еді.
Сол кезде Бибісара Асаубаева мен Алуа Нұрман қарсыласынан басым түссе, Әмина Қайырбекова тең ойнады. Тек Меруерт Камалиденова жеңіліссіз келе жатқан Миллиет Софиеге шамасы жетпеді.
