Отандық гимнасшылар жаңа маусымға дайындықты бастады

Бас бапкер Александр Кимнің басшылығымен команда 2024 жылдың желтоқсанында Алматы қаласындағы СДЮШОР-9 алаңында жаттығуды бастаған. Жақында аяқталған оқу-жаттығу жиынына команданың көптеген көшбасшысы қатысты.

Кимнің айтуынша, құрам өткен олимпиадалық циклден (2021–2024) сақталып қалған. Сонымен қатар команда екі дарынды жас спортшымен толыққан – Павлодардан келген Нұртан Ыдырысов пен Роман Хегай. Роман – жастар арасындағы Азия чемпионатының жеңімпазы, ал Нұртан – осы жарыстардың бірнеше мәрте жүлдегері.

Қазір команда Қатарда оқу-жаттығу жиынын өткізіп жатыр. Доха биылғы маусымда өтетін Әлем кубогының алты кезеңнің бірін қабылдайды.

"Команданың негізгі құрамы Дохадағы оқу-жаттығу жиынында Әлем кубогы кезеңдеріне дайындық үстінде. Мұнда өте жақсы жағдай жасалған. Сонымен қатар Қатар астанасы биылғы маусымдағы алты лицензиялық кезеңнің бірін өткізетін орын болмақ.

Бірінші Әлем кубогы кезеңі Германияның Котбус қаласында өтеді. Одан кейін он күннен соң Әлем кубогы кезеңі Бакуде ұйымдастырылады", – деп атап өтті команданың бас бапкері Александр Ким.

Алғашқы екі кезеңде келесі гимнасшылар өнер көрсетеді:

- Милад Карими (еркін жаттығу, кермедегі жаттығу)

- Дмитрий Патанин (еркін жаттығу, шығыршық және қоссырықтағы жаттығу)

- Ілияс Әзизов (ат снаряды, шығыршық және кермедегі жаттығу)

- Зейнолла Ыдырысов (ат снарядындағы жаттығу).

Александр Кимнің айтуынша, алғашқы кезеңдерге Қазақстан құрамасынан тек жаңа ережелерге сай комбинацияларын сақтап қалған спортшылар ғана қатысады.

Жаңа ережелер спортшылардан жоғары шеберлікті талап етеді: комбинациядағы элементтер саны 10-нан 8-ге қысқарды. Сонымен қатар жаттығулар тек күрделі ғана емес, сондай-ақ техникалық тұрғыда мінсіз орындалуы тиіс. Бұл өзгерістер әлемдік аренадағы бәсекелестік деңгейін арттырады, себебі бағалау ережелері де қайта қаралған.

Айта кетейік, алғашқы екі кезеңге 2024 жылғы Олимпиада ойындарының күміс жүлдегері Нариман Құрбанов қатыспайды.

"Нариман мен Зейнолла Прага қаласындағы гимнастика базасында жеке дайындық жоспарымен жаттығып жатыр. Құрбанов әлі толық қалпына келген жоқ. Ол Әлем кубогының үшінші кезеңіне (Анталья, Түркия) жаңа бағдарламасын дайындап жатыр. Ол құрама сапында, бірақ жарысқа наурыз айынан бастап қатысады. Біз сол уақытқа дейін оның қажетті спорттық деңгейге жететінін жоспарлап отырмыз", – деп мәлімдеді Александр Ким.

Бірінші Әлем кубогы кезеңі Германияның Котбус қаласында 20-23 ақпан аралығында өтеді. Келесі кезеңді Баку 6-9 наурыз аралығында қабылдаса, ал Түркияның Анталья қаласындағы жарыс 20-23 наурыз аралығында ұйымдастырылады.

Қазақстандық гимнасшылардың алдында маусымның алғашқы медальдарын жеңіп алып, рейтингтік ұпайлар есебін ашу міндеті тұр.