Мәжіліс тыйым салатын заңды мақұлдады.
Қазақстанда енді сырттан келген спортшыларға, яғни легионерлерге мемлекет есебінен ақша төленбейді. Бұл туралы КТК телеарнасы хабарлады. Тыйым салынатын заңды Мәжіліс депутаттары екінші оқылымда мақұлдады.
Заңға "жоғары жетістіктер спорты" деген түсінік енгізілген. Бұдан былай, спортқа бөлінген қаражат соларға бағытталады дейді депутаттар. Жоғары жетістіктер спортына: Олимпиада, Паралимпиада, Сурдолимпиада, Пара-Азия және Ұлттық спорт түрлері кіреді. Бұдан басқасына қаражат бөлінбейді.
Еске салсақ, бұған дейін депутаттар спорт клубтары жұмсалған миллиардтардың есебін беруге тиіс екенін айтып, бұл салаға есепсіз қаражат бөлуді доғаруды ұсынды. Олар Қазақстан аталмыш салаға қаржы бөлуден талай елді басып озса да, жүлделі орын тым аз екеніне баса назар аударды.
