Қазақстандық волейболшылардың жалақысы легионерлерді қаржыландыруды шектеу туралы заң қабылданар алдында өсті.
Бұл жыл сайын қайталанатын үрдіс. Алайда, биылғы маусымда қазақстандық волейболшылардың келісімшарттық талаптары айтарлықтай өскен.Бұл туралы sportarena.kz жазады. Мысалы, бұрын ортаңғы деңгейдегі ойыншы, яғни негізгі құрамда жиі ойнамайтын спортшы 500 мың теңгеден артық еңбекақы алмаса, қазір олар кемінде 1 миллион теңге жалақы талап етуде.
Әйелдер Ұлттық лигасының биылғы маусымында 10 клуб бақ сынап жатыр. Алдағы уақытта Қазақстанда легионерлерді мемлекеттік қаржы есебінен қаржыландыруға тыйым салатын заң қабылданбақ. Осыған байланысты демеушілері жоқ, тек бюджет есебінен жұмыс істейтін клубтар отандық ойыншыларға басымдық бере бастады. Бұл сұраныстың артуына әкеліп, қазақстандық волейболшылардың жалақысын жоғарылатты.
Бұл заң күшіне енген жағдайда жергілікті ойыншылардың маңыздылығы артады. Сонымен қатар клубтар өз құрамын күшейту мақсатында жас ойыншыларды дамытуға және ішкі резервті толықтыруға көбірек көңіл бөлуі мүмкін.
