Сауд Арабиясының атақты шейхы әрі ірі бокс инвесторы Турки әл аш-Шейх күтпеген мәлімдеме жасап, жанкүйерлерін таңқалдырды. Ол Twitter-де жазба жариялап, бокстан кететінін хабарлады.
Турки әл аш-Шейх өзінің парақшасында бокс жанкүйерлеріне арнап арнайы жазба қалдырды:
“Қымбатты жанкүйерлер!
Бүгін бокстағы соңғы күніміз. Осы сапарда менімен бірге болған барлық адамдарға алғыс білдіремін. Лондон мен Нью-Йоркте жекпе-жекке шығуы тиіс достарыма кешірім сұраймын – дайындық лагеріне кеткен уақытыңыз бен күшіңіз үшін. Бұл екі іс-шара ресми түрде тоқтатылды. Сіздерге болашақ жекпе-жектеріңізде сәттілік тілеймін.
Ізгі ниетпен, Турки.”
Бірақ сарапшылар Турки әл аш-Шейхтің бокстан мүлдем кетіп бара жатқанына күмәнмен қарайды. Себебі:
Бір айдан кейін Эр-Риядта Сауль Альварес пен Уильям Скалл қатысатын ірі турнир жоспарланған.
Сонымен қатар Артур Бетербиев пен Дмитрий Бивол арасындағы ықтимал трилогия туралы да сыбыс бар — ол да Сауд Арабиясында өтуі мүмкін.
Бұған қоса Турки Дана Уайтпен бірлесіп TKO промоушенін құрған. Бұл ұйым қазірдің өзінде Қазақстандық Олимпиада чемпионы Данияр Елеусиновті өз қатарына қосты.
Турки соңғы жылдары Сауд Арабиясын жаһандық бокс аренасына шығарған басты фигуралардың бірі болды. Оның қолдауының арқасында Эр-Риядта әлемдік деңгейдегі жекпе-жектер өтті. Сондықтан бұл мәлімдеме — тек уақытша үзіліс немесе маркетингтік тактика болуы мүмкін.
