Ақтөбелік жас футболшының өліміне қатысты тың деректер белгілі болды.
Қайғылы жағдайға қатысты тергеу басталды. Тергеушілер газ жабдығында ақау болуы мүмкін деген нұсқаны тексереді.
Облыстық Төтенше жағдайлар департаменті баспасөз қызметінің хабарлауынша, кеше кезекші бөлімге Ақтөбе қаласындағы Кутуев көшесінде болған оқиға туралы хабарлама келіп түскен.
"Құтқарушылар оқиға орнына жеткенде өрт болмағаны анықталды және үш адамның денесі табылды", - дейді Ақтөбе облысының ТЖД өкілдері.
Қазіргі уақытта полиция қызметкерлері барлық қажетті тергеу әрекетін жүргізуде. Сот-медициналық сараптама тағайындалды.
Ведомство өкілдері оқиғаның себебі мен мән-жайы анықталып жатқанын атап өтті. Ақтөбе облыстық полиция департаментінің баспасөз қызметі бір үйден үш адамының өліміне қатысты тергеу басталғанын хабарлады.
"Газ жабдығына техникалық сараптама жүргізіліп, оқиғаның себептері мен мән-жайы анықталуда", - деді департаменттегілер.
Естеріңізге сала кетейік, бұған дейін Ақтөбе U-16" командасының ойыншысы, 15 жастағы футболшы Арон Мұса өмірден өткені белгілі болды.Онымен бірге әжесі және немере ағасы да көз жұмды.
