Қазақстан ұлттық бокс құрамасының бас бапкері Қайрат Сәтжанов Ташкентте өткен оқу-жаттығу жиыны барысында Олимпиаданың екі дүркін чемпионы Баходир Джалоловтың үйінде қонақ болып, 2026 жылдың наурыз айында Өзбекстан құрамасы Қазақстанға келетінін мәлімдеді.
19 қарашадан бастап Ташкентте Қазақстан, Өзбекстан, Қырғызстан және Таиланд құрамаларының қатысуымен ірі оқу-жаттығу жиыны өтті.
Боксшылар бірнеше күн қатарынан спарринг өткізіп, тәжірибе алмасты. Ал жаттықтырушылар тактика мен дайындық жүйелерін бөлісті.
Жиынның соңғы күнінде қазақстандық делегация өзбек оғланы Баходир Джалоловтың шаңырағында қонақта болып, екі ел бокс мектептері арасындағы байланыс тағы бір деңгейге көтерілді.
Асқар Еркебаев жариялаған видеода Қайрат Сәтжанов Ташкенттегі оқу-жаттығу жиынының нәтижесін қорытындылап, Джалоловқа алғысын білдіреді:
«Біз келген күннен бері өте жақсы спаррингтер өтті, тәжірибе алмастық. Бүгін – соңғы күн, финалдық спаррингтер болды. Енді бәріміз сенің үйіңдеміз. Ағаң Тулқин айтқандай, өзара құрмет сақталсын, осының бәрі дәстүрге айналсын. Алдағы уақытта, наурыз айында, сіздер бізге қонақ болып келесіздер», – дейді Қазақстан құрамасының бас бапкері.
Осылайша Сәтжанов алдағы жылы Өзбекстан құрамасы Қазақстанға келіп, жауапты оқу-жаттығу жиынын өткізетінін ресми түрде хабарлады.
