Қарағандылық боксшы, Қазақстан құрамасының өкілі Аида Әбікеева ауыр жарақатына қарамастан рингке шығып, Азия чемпионатында жеңіске жеткені белгілі болды. Бұл ақпаратты спортшының бапкері Ислам Әбдірайымов «Ласточка шахтерского города» деректі фильмінде айтып берді. Аталған фильм 27 желтоқсанда жарық көрген.
Ислам Әбдірайымовтің сөзіне қарағанда, іріктеу жарыстарының алдында бір апта қалғанда Аиданың қолы сынып кеткен. Соған қарамастан ол жекпе-жекке қатысып, жеңісті қолдан бермеген. Бапкердің айтуынша, жарақаттан кейін толыққанды қалпына келуге бір айға жуық уақыт қана болған.
Әбікеева 63 келіге дейінгі салмақ дәрежесінде үздік атанып, финалда Вьетнам спортшысы Ха Линмен кездескен. Жекпе-жек қорытындысында қазақстандық боксшы төрешілер шешімімен жеңімпаз деп танылды.
Жарақатқа қарамастан жеңіске жеткен бұл оқиға Аида Әбікееваның спорт жолына арналған «Ласточка шахтерского города» деректі фильмінде қозғалған. Фильм кейіпкері – Қарағанды өңірінің спортшысы.
