Әлемге әйгілі британдық суперауыр салмақтағы боксшы, бұрынғы әлем чемпионы Энтони Джошуа Нигерияда болған ауыр жол-көлік оқиғасынан кейін ауруханаға жеткізілді. Шетелдік БАҚ мәліметінше, спортшының жағдайы тұрақты.
Оқиға салдарынан Джошуаның жақын достары әрі команда мүшелері Сина Гами мен Латиф Айоделе қаза тапқаны хабарланды. Марқұмдардың бірі күштік дайындыққа жауап берген маман болғаны, екіншісі жаттығу штабына кіргені атап өтіледі.
Боксшының промоутері Эдди Хирн Джошуаның медициналық бақылауда екенін растады. Оның айтуынша, спортшы ауруханада тексерістен өтіп, дәрігерлер қадағалауында болады және отбасының жеке өміріне құрметпен қарауды сұрады.
Ақпараттарға сәйкес, жол апаты Лагос – Ибадан тасжолында (Нигерия) болған. Джошуа отырған Lexus жол жиегінде тұрған жүк көлігімен соқтығысқан. Тергеу материалдарында негізгі себеп ретінде жылдамдықты шамадан тыс арттыру және қауіпті басып озу нұсқасы айтылады.
Reuters пен AP дерегінше, Энтони Джошуа жеңіл жарақаттар алған, ауруханада ем қабылдап жатыр. Ресми органдар оның жағдайы шұғыл реанимациялық көмекті қажет етпейтінін де хабарлаған.
