Қазақстан құрамасының көшбасшыларының бірі, әлем чемпионы Абылайхан Жүсіпов бұрынғы бас бапкер Қайрат Сәтжановтың орындалмай қалған арманы туралы ой білдірді.
Жүсіпов Қайрат Сәтжановтың адамгершілік қасиетін ерекше атап өтіп, оның боксшылармен тіл табыса білетінін айтты. Сондай-ақ қызық сәйкестікті де бөлісті. Спортшының әкесінің де аты Қайрат, әрі әкесі мен Қайрат Тұрсынханұлы бір күнде туғанын айтып, бапкерді “екінші әкесі” секілді құрметтейтінін жеткізген.
Абылайханның сөзінше, Сәтжановтың бір арманы ішінде қалып қойған: ұлттық құраманы Олимпиадаға бастап бару.
Ол бұл ойды былай түсіндірді: спортшы үшін Олимпиадаға қатысу — үлкен арман болса, бапкер үшін әуесқой бокстағы ең биік шың да дәл Олимпиадамен өлшенеді.
Жүсіпов қазір құраманың жаңа бапкермен жұмысын бастап кеткенін, оқу-жаттығу жиындары өтіп жатқанын және команданың жаңа талаптарға бейімделіп жатқанын да айтты.
Қайрат Сәтжанов 2024 жылдың тамызында Париждегі Олимпиада-2024-тегі сәтсіздіктен кейін ұлттық құраманың тізгінін ұстаған. Ал 2026 жылғы 10 қаңтарда оның қызметтен кеткені хабарланып, бас бапкерлікке Нұржан Насанов келген.
