Еркебұлан Тоқтармен төбелеспек болған өзбек файтері түрмеге қамалды

Өзбекстандық ММА спортшысы Шахзод Узоков (Gold) сот үкімімен 3 жыл 13 күнге бас бостандығынан айырылды. Бұл туралы Quloq.news хабарлады.

Дереккөз мәліметінше, Узоковқа қатысты үкім прокуратураның кассациялық наразылығынан кейін қайта қаралып, нәтижесінде нақты жаза тағайындалған.

"Шахзод Gold Узоков 3 жыл 13 күнге бас бостандығынан айырылды", — деп хабарлайды өзбекстандық БАҚ.

Шахзод Узоков Қазақстанда 2025 жылдың соңында Еркебұлан Тоқтарға жекпе-жекке шақыру жасағаннан кейін кеңінен танылды.

Ташкентте өткен турнир кезінде қос спортшы:

• көз арбасты;
• кейін жекпе-жекке келісімшартқа қол қойды.

Алайда айқас сол күйі өтпеді. 

2026 жылдың ақпан айында өткен Oktagon 84 турнирінде Узоков октагонға шығып, әзербайжандық Мұхаммадали Нурусовқа қарсы жұдырықтасты.

Жекпе-жек бірінші раундта аяқталды. Узоков техникалық нокаутпен жеңіліп қалды. Айта кетейік, бұл қарсыласының кәсіби мансабындағы екінші ғана жекпе-жегі болған.