Иранда ұлттық құрама балуаны өлім жазасына кесілді

Иранда 19 жастағы еркін күрес шебері, ұлттық құраманың мүшесі Салех Мұхаммади өлім жазасына кесілді. Бұл туралы халықаралық ақпарат көздері хабарлады.

Үш адам бір күнде жазаланды

19 наурыз күні Иранның Құм қаласында үш адам — Салех Мұхаммади, Мехди Гасеми және Саид Давуди — дарға асу арқылы жазаланды. Оларға:

• полицейлердің өліміне қатысы бар;
• елдегі тәртіпсіздіктерге араласқан;
• шетелдік күштердің мүддесіне әрекет еткен деген айыптар тағылды.

Халықаралық құқық қорғау ұйымдары қазір бұл іске қатысты алаңдаушылық танытып отыр. Олардың мәліметінше, сот процесі әділ өткен жоқ. Айыпталушыларға қысым көрсетілгендіктен, олар амалсыз мойындауға мәжбүр болуы мүмкін. 

Мұхаммади — болашағынан үміт күттірген спортшы

Салех Мұхаммади Иранның еркін күрес құрамасында өнер көрсеткен жас спортшы еді.

2024 жылы ол Ресейдің Красноярск қаласында үш дүркін Олимпиада чемпионы Бувайсар Сайтиевтің жүлдесіне арналған турнирде 71 келі салмақта белдесіп, қола медаль жеңіп алды. 

Жаза саяси ахуалмен байланысты

Иранда 2025 жылдың соңында экономикалық жағдайға байланысты жаппай наразылықтар басталды.

Ресми деректер бойынша, тәртіпсіздіктер кезінде 2 мыңға жуық адам қаза тапты. Елде интернетке шектеулер енгізілді. 

Иран билігі бұл оқиғаларға АҚШ пен Израильді айыптады.