Қазақстан құрамасының көшбасшысы, WTA рейтингінің 10-орнында тұрған Елена Рыбакина Билли Джин Кинг кубогының іріктеу матчтарында жарқыраған ойын көрсетті. Брисбенде өткен кездесулерде ол Қазақстан құрамасын финалдық кезеңге алып шықты.
Қазақстан 10 сәуірде Австралияны, ал 11 сәуірде Колумбияны айқын басымдықпен жеңді.
Бірақ жанкүйерлер мен БАҚ өкілдерінің назары теннисшінің беті мен мойнындағы қызару мен бөртпелерге ауды. Бұл жағдай Еленаның денсаулығына алаңдаушылық тудырды.
Матчтан кейінгі баспасөз конференциясында Рыбакина өз жағдайын түсіндіріп берді:
“Бұл – аллергиялық реакцияның салдары. Бұған дейін де әртүрлі елдерде өткен турнирлерде осындай жағдайлар болған”, – деді спортшы.
Рыбакина бұған дейін де аллергиялық қиындықтарға тап болған, әсіресе басқа құрлықтардағы жарыстарда бұл жиі байқалған. Соған қарамастан ол жоғары деңгейде өнер көрсетіп, Қазақстан құрамасына адалдығын дәлелдеп келеді.
Қазір спортшының жағдайы дәрігерлердің бақылауында, ал жанкүйерлер оның тезірек сауығып, алдағы жарыстарда толық өнер көрсетуін тілеп отыр.
