Қазақстандық теннис жұлдызы Елена Рыбакина (WTA рейтингінде 10-орын) Билли Джин Кинг кубогы іріктеу кезеңінде Колумбияның өкілі Юлиана Лизаразоны (684-орын) оңай ұтып, еліміздің финалдық кезеңге жолдама алуын қамтамасыз етті.
Матч Австралияның Брисбен қаласында өтті. Рыбакина небәрі 52 минуттың ішінде қарсыласын екі сетте ұтты — 6:1, 6:2. Бұл жеңіс Қазақстан құрамасының екінші жеңіс ұпайы болып тіркелді және жалпы жеңісті қамтамасыз етті.
Осыған дейін Юлия Путинцева (23-орын) Валентина Медиорреаль Ариасты (804-орын) тас-талқан етіп жеңген болатын — 6:0, 6:1. Осылайша, қазақстандық теннисшілер қарсыластарына бірде-бір мүмкіндік қалдырмай, айқын басымдықпен көш бастады.
Осы нәтижелердің арқасында Қазақстан әйелдер құрамасы Билли Джин Кинг кубогының финалдық кезеңіне мерзімінен бұрын жолдама алды. Біздің құрамамыз Австралия мен Колумбия қатысқан топта бірінші орынды иеленді.
Бүгін жарыс бағдарламасында жұптық матч та бар: Жібек Құламбаева мен Анна Данилина кортқа шығып, Мария Паулина Перес Гарсия / Юлиана Лизаразо дуэтімен кездеседі.
