Қазақстандық теннис жұлдызы Елена Рыбакина беделді турнирдің үшінші айналымына жолдама алды.
Италия астанасы Римде өтіп жатқан WTA 1000 санатындағы турнирде Қазақстанның бірінші ракеткасы Елена Рыбакина алғашқы кездесуін сәтті аяқтады. WTA рейтингінде 12-орында тұрған спортшымыз жарысты екінші айналымнан бастап, германиялық Ева Лиске қарсы кортқа шықты.
Айта кетейік, Лис осыған дейін жапониялық Моюка Утидзиманы 6:1, 6:0 есебімен сенсациялық түрде жеңіп, көпшілікті таңғалдырған еді. Алайда Рыбакина тәжірибесін көрсетті: қос сетте де басым түсіп, матчты 7:6, 6:2 есебімен өз пайдасына аяқтады.
2025 жылғы Рим турнирінде әйелдер арасындағы жалпы жүлде қоры — 6 009 593 еуроға тең. Турнир жеңімпазы 877 390 еуро көлемінде сыйақы алады және WTA рейтингіне 1000 ұпай қосады.
Рыбакина үшін бұл турнир ерекше мәнге ие. Ол 2023 жылы дәл осы алаңда чемпион атанған. Биылғы жарыста Елена тағы да мықты формасын көрсетіп, атағын қорғауға ниетті екенін аңғартты.
