Қазақстанның тәжірибелі теннисшісі Зарина Дияс Жапонияда өтіп жатқан ITF сериясындағы элиталық турнирдің финалына жолдама алды.
31 жастағы отандасымыз жартылай финалда қытайлық Мэйлин Ванды үш сетте 6:3, 3:6, 7:5 есебімен жеңді. Ойын 2 сағат 16 минутқа созылып, соңына дейін шиеленісті тартысқа толы болды.
Матчтың үшінші сетінде Зарина 4:5 есебімен ұтылып жатқан. Бірақ жеңісті қолдан бермей шешуші сәттерде камбэк жасап, финалға жолдама алды.
Зарина Дияс финалда турнирдің қожайыны, әлемдік рейтингте 288-орында тұрған Аяно Шимицу есімді жапон теннисшісімен кездеседі.
