Қазақстандық теннис жанкүйерлері тарихи матчтың куәсі болды. Ел намысын қорғаған Александр Бублик әлемнің үздік ондығындағы теннисшіні жеңіп, "Ролан Гаррос" турнирінің келесі кезеңіне жолдама алды.
Қазақстан құрамасының көшбасшысы, әлемдік рейтингте 62-орында тұрған Александр Бублик 2025 жылғы маусымдағы ең әсерлі ойынының бірін көрсетті. Ол екінші айналымда әлемнің 9-ракеткасы, австралиялық Алекс де Минаурды 2:6, 2:6, 6:4, 6:3, 6:2 есебімен сенсациялық түрде жеңіп шықты. Кездесу 2 сағат 55 минутқа созылды.
Бұған дейін Бублик пен Де Минаур төрт рет кортта жолыққан, есеп – 1:3 австралиялықтың пайдасына. Алайда бұл жолы Бублик мінез көрсетіп, өз карьерасындағы ең керемет камбэктердің бірін жасады.
27 жастағы қазақстандық теннисші үшінші айналымда Роша мен Меншик арасындағы жеңімпазбен ойнайды. Бұл оның "Ролан Гаррос" турниріндегі келесі үлкен сынағы болмақ.
Бұған дейін Бублик алғашқы айналымда тағы бір австралиялық теннисші Джеймс Даквортты 6:2, 6:4, 6:4 есебімен сенімді түрде жеңген. Енді ол қатарынан екі австралиялық спортшыны жарыстан шығарды.
Былтырғы "Ролан Гаррос" турнирінде Александр Бублик екінші айналымда жарыс жолынан шығып қалды. Ол бірінші айналымда француз Грегоар Баррерді 6:4, 7:5, 6:3 есебімен жеңсе, екінші айналымда неміс теннисшісі Ян-Леннард Штруффқа 2:6, 2:6, 3:6 есебімен жол берді.
