Анна Данилина чехиялық серіктесі Мари Боузкова екеуі Истборндағы WTA 500 санатындағы турнирдің финалына шықты.
Олар жартылай финалда жергілікті Хэрриет Дарт / Майя Люмсден жұбын 2:6, 7:5, 11:9 есебімен тізе бүктірді. Матч 1 сағат 37 минутқа созылды.
"Көп бөлігі біз үшін тығырықта өткен матчта шешуші сәттерде сабыр сақтай білдік", – дейді Анна матчтан кейін.
Бұл Анна Данилинаның қатарынан төртінші финалы. Бұған дейін "Ролан Гаррос" турнирінде сербиялық Александра Круничпен финалға жетіп, Сара Эррани / Жасмин Паолини жұбына жол берген.
Одан соң Лондон турнирінде ресейлік Диана Шнайдермен бірге финалда Эйжа Мухаммад / Деми Схюрс дуэтінен ұтылған.
Ал өткен аптада Ноттингем финалында жапондық Ена Шибахарамен бірге Беатрис Хаддад Майя / Лаура Зигемунд жұбына есе жіберген.
Данилина мен Боузкова Истборн турнирінің шешуші кездесуінде Жулиана Олмос / Рената Сарасуа (Мексика) және Майя Джойнт (Австралия) / Се Шувэй (Тайбэй) жұптарының жеңімпазымен кортқа шығады.
