Италиялық теннисші Янник Синнер Уимблдон турнирінің ширек финалына шықты. Алайда оның бұл жетістігі көрермендер мен жанкүйерлер арасында дау туғызды. Себебі ол қарсыласы Григор Димитровтың жарақат алған сәтінде күліп тұрған.
Матчта болгариялық Димитров 6:3, 7:5, 2:2 есебімен алда келе жатқан. Бірақ үшінші партия кезінде ол иығынан қатты жарақат алып, ауырсынуға төтеп бере алмай, жерге құлап түсті. Дәрігерлер көмектескенімен, ол ойынды жалғастыра алмады.
Синнер бірден жарақат алған қарсыласына қарай жүгіріп, алаңдаушылық танытқандай болды. Алайда телекамералар оны басқа қырынан көрсетті — сол сәтте италиялық теннисші жымиып, күлімсіреп тұрған. Бұл көрініс жанкүйерлердің ашуын тудырды.
Әлеуметтік желілерде спорт сүйер қауым Синнердің әрекетін "этикеттен тыс" және "спорт рухына қайшы" деп бағалады. Көпшілік оның бұл күлкісі шынайы жанашырлық емес, ішкі қуанған сезімнің сыртқа шыққан сәті деп түсінді.
Матчтан кейін Синнер:
“Мен мұндай жолмен ширек финалға шыққаныма өкініш білдіремін. Димитров үшін алаңдаулымын” – деп мәлімдеді.
Алайда оның жымиған сәті бүкіл әлемге тарап кеткен еді. Жанкүйерлер оның бұл сөзіне сенбейтінін ашық жазып жатыр.
Уимблдондағы келесі айналымда Янник Синнер АҚШ өкілі Бен Шелтонмен кортқа шығады. Бұл матч жанкүйерлер үшін ерекше қызығушылық тудырып отыр — себебі көпшілік Синнердің моральдық бейнесіне күмәнмен қарай бастады.
