Қазақстанмен ерекше байланысы бар жұлдыз спортшы бұл турнирді теннис жолындағы жаңа белес деп атады.
Әлемге әйгілі теннис жұлдызы, US Open-2021 жеңімпазы Даниил Медведев Алматыда өтетін ATP-250 санатындағы ірі турнирде өнер көрсетеді. Бұл туралы Қазақстан теннис федерациясы баспасөз қызметі хабарлады.
Медведевтің Қазақстанмен байланысы бұрыннан ерекше: 2022 жылы ол Астанада өткен ATP-500 турнирінің жартылай финалына дейін жетіп, финалға бір қадам қалғанда Новак Джоковичке матчбол ұтқызып, жарыстан шыққан. Ал кәсіби мансабындағы алғашқы жасөспірімдер арасындағы чемпиондық титулын ол дәл осы Қазақстанда – Өскеменде жеңіп алған болатын.
«Алматыда алғаш рет ойнауға асығудамын. Бұл менің теннис жолымдағы жаңа тарау болмақ. Қазақстандық жанкүйерлердің қонақжайлығы мен жанды қолдауы туралы бұрыннан білемін. Тағы бір мәрте осы елге оралатыныма қуаныштымын. Кортта жүздескенше!» – деді Даниил Медведев.
Өткен жылы дәл осы ATP-250 турнирінде Медведевтің отандасы Карен Хачанов топ жарған еді. Биылғы жарыста Медведевпен қатар тағы бірқатар танымал теннисшілердің келуі мүмкін. Ұйымдастырушылар көрермендер үшін ерекше шоу мен мазмұнды бағдарлама дайындап жатқанын атап өтті.
