Тимофей Скатов Швецияның Бостад қаласында өтіп жатқан халықаралық турнирде іріктеу кезеңінің финалына жолдама алды.
ATP рейтингінде 209-орында тұрған Тимофей Скатов іріктеудің жартылай финалында үндістандық Сумит Нагалды (ATP №296) екі сетте жеңді — 6:2, 6:4. Кездесу 1 сағат 26 минутқа созылды. Қазақстандық спортшы матч барысында сенімді ойын өрнегін көрсетіп, қарсыласын қыспаққа алды.
Іріктеудің финалында Скатовтың қарсыласы италиялық Андреа Пеллегрино (ATP №139) мен польшалық Даниэль Михальскидің (ATP №297) арасындағы кездесуден кейін анықталады. Осы матчтың жеңімпазы негізгі турнирге өту жолдамасына таласады.
Бостадтағы турнирдің жалпы жүлде қоры — 596 035 еуро. Турнир жеңімпазы 90 675 еуро қаржылай сыйақы мен 250 ATP рейтингілік ұпайын иеленеді.
