Қазақстандық теннисші Зарина Дияс Португалияның Фигейра-да-Фош қаласында өтіп жатқан ITF W100 сериялы турнирінде 1/8 финалға шықты.
Турнирдің алғашқы айналымында WTA рейтингінде 269-орында тұрған Дияс латвиялық Диана Марцинкевичті (№694) 6:1, 6:0 есебімен тас-талқан етті. Бұл матч бар болғаны 44 минутқа созылды.
Зарина матчты алғашқы геймдерден-ақ толық бақылауға алды. Ол артқы шептегі ойын мәнерін түрлендіріп, қарсыласына шабуыл жасауға еш мүмкіндік қалдырмады. Ал 32 жастағы Марцинкевич тек бір гейм ғана ұтып, матч бойы қарсыласуға қауқарсыз болды.
Енді Дияс 1/8 финалда Францияның Тесса Адрианяфитримосымен кездеседі. Теннисші қазір WTA рейтингінде 344-орында тұр. Бұл матч 25 шілде күні өтеді.
Айта кетейік, Зарина Дияс Билли Джин Кинг Кубогының финалдық кезеңіне шақырту алған. Бұл халықаралық дода 16–21 қыркүйек аралығында Қытайдың Шэньчжэнь қаласында өтеді. Дияс – Қазақстан әйелдер құрамасының кеңейтілген тізіміндегі маңызды ойыншылардың бірі.
