Испаниялық жұлдыз Карлос Алькарас Нью-Йоркте өткен US Open-2025 турнирін жеңіп алып, мансабындағы үшінші «Үлкен дулыға» жүлдесін иеленді. Бұл триумф оның теннис әлеміндегі орнын бекітіп қана қоймай, тарихқа да енгізді: Алькарас жүлде қоры бойынша тарихтағы алтыншы теннисші атанды.
US Open финалы жанкүйерлер күткендей тартысты өтті. Алькарас алғашқы сетте 6:2 есебімен жеңіл үстемдік құрды, бірақ екінші сетте Синнер қарымта жасап, 3:6 есебімен таразыны теңестірді.
Дегенмен, шешуші сәтте жас испандық шын мәнінде чемпиондық мінез көрсетті: үшінші сетте қарсыласына мүмкіндік бермей, 6:1 есебімен жеңді. Төртінші партияда да суырылып шығып, 6:4 есебімен матчты аяқтады.
Қорытынды есеп: 6:2, 3:6, 6:1, 6:4.
Осылайша Алькарас Нью-Йорктің басты аренасында өз дәуірінің чемпионы екенін тағы бір мәрте дәлелдеді.
Жеңісі үшін Алькарас рекордтық 5 млн доллар алды. Оның мансаптық табысы енді 53,5 млн долларға жетті. Бұл көрсеткішпен ол тарихтағы ең табысты теннисшілердің қатарына еніп, тек Джокович, Надаль, Федерер, Маррей және Зверевке ғана жол береді.
Сонымен қатар, Карлос биылғы маусымда 15,6 млн доллар тауып, ATP турының №1 табыс иесі атанды.
2025 жылғы маусым Алькарас үшін айрықша болды:
Алькарас қазіргі уақытта жеңілуді ұмытып бара жатқандай.
Сарапшылар Алькарасқа ерекше баға беріп отыр. Нью-Йорктегі триумф оның әлеуетін айқын көрсетті. Оны қазірдің өзінде «Үлкен үштіктің» мұрагері және теннистің жаңа символы деп атайды.
Жас испандық қарқынын тоқтатпаса, алдағы жылдары тарихтағы ең табысты әрі ең титулды ойыншыға айналуы ғажап емес.
