Қазақстандық теннис жұлдызы Елена Рыбакина Токиода өткен WTA-500 турнирінің жартылай финалына шығып, 2025 жылғы маусымның басты жарысы — WTA Финалдық турниріне жолдама алды.
Рыбакина жартылай финалға шығу үшін Канада өкілі Виктория Мбоконы сенімді түрде ұтып, өзінің жоғары деңгейдегі ойынын тағы бір дәлелдеді. Осы нәтижеден кейін қазақстандық спортшы әлемнің үздік сегіз теннисшісі қатысатын WTA Finals турниріне қатысу құқығын автоматты түрде иеленді.
Белгілі португалиялық спорт шолушысы Жозе Моргадо әлеуметтік желідегі парақшасында Рыбакинаның еңбегін ерекше атап өтті:
«Рыбакина соңғы екі аптада керемет еңбек сіңіріп, Финалдық турнирге жолдама алды. Бұл – нағыз фантастика!»
Маусымның ең беделді турнирі — WTA Finals 2025 1–8 қараша аралығында Сауд Арабиясының Эр-Рияд қаласында өтеді. Мұнда маусым бойы ең үздік нәтиже көрсеткен 8 теннисші бақ сынайды.
