Негізгі себеп: жарақатты асқыныдырып алмау.
Қазақстанның бірінші ракеткасы Елена Рыбакина Жапонияның Токио қаласында өтіп жатқан беделді WTA 500 турнирінде жарысты жалғастыра алмады. Әлемнің жетінші ракеткасы саналатын спортшы беліндегі жарақатына байланысты жартылай финалдан бас тартып, Азия сериясындағы сәтті өнерін өкінішті нотада аяқтады.
Бүгін, 25 қазанда, Елена Рыбакина кортта Чехия теннисшісі, әлемдік рейтингтің 17-нөмірі Линда Носковамен кездесуі керек болатын. Алайда матч басталардан бірнеше сағат бұрын турнир ұйымдастырушылары қазақстандық спортшының жарыстан шыққанын хабарлады.
WTA баспасөз қызметінің ресми мәліметінше, Рыбакинаның жарысты жалғастыра алмауына бел жарақаты себеп болған.
«Өкінішке қарай, бүгін ойнай алмаймын. Бұл аптада арқамда қиындықтар болды, 100% күшіммен ойнауға мүмкіндік жоқ. Жанкүйерлерімнің мені бүгін көре алмайтынына қынжыламын, бірақ келесі жылы кездесеміз деп үміттенемін», — делінген Рыбакинаның ресми мәлімдемесінде.
Осылайша, Линда Носкова қарсыласының бас тартуына байланысты финалға тікелей жолдама алды. Ол шешуші сында швейцариялық Белинда Бенчич пен америкалық София Кенин арасындағы матчтың жеңімпазымен кездеседі.
Елена Рыбакинаның бұл шешімі оның соңғы апталардағы тығыз жарыс кестесіне байланысты болды. Өткен аптада ол Қытайдың Нинбо қаласында өткен турнирде жеңімпаз атанды. Ал Токиода екі ауыр матч өткізіп үлгерді.
Төрт ширек финалда канадалық Виктория Мбоконы (6:3, 7:6) жеңгеннен кейін Рыбакина қараша айында өтетін WTA маусымдық финалына жолдама алғанын ресми түрде қамтамасыз етті. Осы басты мақсатқа жеткеннен кейін спортшы жарақатын асқындырмау үшін жарысты жалғастырмау жөнінде шешім қабылдаған сияқты.
