Елена Рыбакинаның азаматтығына қатысты ақпарат жоққа шығарылды

Федерация не деді?

Федерацияның мәлімдеуінше, Ресей теннис федерациясының президенті Шамиль Тарпищевтің Рыбакинаның азаматтығына қатысты айтқандары шындыққа жанаспайды.

ҚТФ таратқан ресми ақпаратта бірнеше маңызды жайт нақты көрсетілді:

• Елена Рыбакина Мәскеуде тұрмайды;
• ол Қазақстан Республикасының азаматшасы;
• қолында қазақстандық төлқұжат бар;
• Астанада тіркеуде (пропискада) тұр;
• «ресейлік азаматтығы бар» немесе «спорттық азаматтық» туралы сөздер фактіге сәйкес келмейді;
• Қазақстанда «спорттық азаматтық» деген ұғым заңды түрде қолданылмайды.

Федерация өкілдерінің айтуынша, Рыбакина мұны өзі де бірнеше мәрте ашық мәлімдеген.

Рыбакина Қазақстанды қашаннан бері қорғайды?

ҚТФ дерегіне сәйкес, Елена Рыбакина 2018 жылдан бері барлық халықаралық турнирде Қазақстан атынан ресми түрде өнер көрсетіп келеді. Сондай-ақ оның ұлттық құрама мүшесі екені атап өтілді.

Еске салайық, бұған дейін Шамиль Тарпищев Елена Рыбакина туралы:

«Ол Мәскеуде тұрады, оның Ресей азаматтығы бар. Спорттық — Қазақстан. Бұл спорттық мансап үшін жасалған», деп пікір білдірген.

Ал Қазақстан теннис федерациясы бұл мәлімдемелердің шындыққа сәйкес келмейтінін қадап айтты.