Елена Рыбакинаның матчы сенсациямен аяқталды

Қазақстанның ең үздік теннисшісі Елена Рыбакина (WTA рейтингінде 5-орын) Австралияның Брисбен қаласында өтіп жатқан WTA 500 санатындағы турнирдің ширек финалында өнер көрсетті.

Күтпеген сенсация

Қазақстандық спортшының қарсыласы Чехия өкілі Каролина Мухова (WTA рейтингінде 20-орын) болды. Матчтың қорытындысы бойынша Рыбакина үш сетте сенсациялық түрде жеңіліс тапты — 2:6, 6:2, 4:6. Кездесу басталар алдында Елена айқын фаворит саналған еді. Ойын 2 сағат 4 минутқа созылды.

Осылайша, Каролина Мухова турнирдің жартылай финалына жолдама алып, ол жерде Беларусь теннисшісі Арина Соболенко (WTA рейтингінде 1-орын) мен АҚШ өкілі Мэдисон Киз (7-орын) арасындағы матчтың жеңімпазымен кездеседі.

Еске сала кетейік, бұған дейін турнир барысында Елена Рыбакина қытайлық Чжан Шуайды (79-орын) — 6:3, 7:5 есебімен жеңіп, кейін испаниялық теннисші Паула Бадосаны (25-орын) — 6:3, 6:2 нәтижесімен сенімді түрде ұтқан болатын.