Отандасымыз ширек финалда Гонконг өкілі Кай Томпсонды жеңді. Енді финал үшін матчта америкалық Китон Ханс пен Қытай Тайбэйінің өкілі Куан-Шу Чен жұбының жеңімпазымен кездеседі.
Қазақстандық теннисші Заңғар Нұрланұлы юниорлар арасындағы Australian Open-2026 турнирінде жартылай финалға жолдама алды. Ол ширек финалда аяқ бұлшық етіндегі құрысуға қарамастан, Гонконг өкілі Кай Томпсонды тартысты ойында жеңді.
Кездесу Мельбурндағы "Маргарет Корт" аренасында өтті және үш сетке созылды. Матч нәтижесі — 3:6, 7:6 (7:4), 6:4.
Алғашқы сетте Заңғар Нұрланұлы 2:5 есебімен артта қалып, ауырсынуға байланысты медициналық тайм-аут сұрады. Кортқа шыққан физиотерапевт шұғыл массаж жасағанымен, бірінші партия 6:3 есебімен Томпсонның пайдасына аяқталды.
Екінші сетте де гонконгтық теннисші алғашқы брейкті жасап, алға шықты. Алайда Нұрланұлы дер кезінде жауап беріп, есепті теңестірді. Оныншы геймде қазақстандық төрт сет-пойнтты пайдалана алмады. Томпсон 0:40 есебінен қайта оралып, сет тай-брейкке ұласты. Тай-брейкте Заңғар бесінші сетболда жеңісті жұлып алып, матчтағы есепті теңестірді — 7:6 (7:4).
Үшінші, шешуші сет Нұрланұлы үшін сәтті басталды — ол екі брейк жасап, 3:0 есебімен алға шықты. Алайда дәл осы сәтте аяқтағы құрысу күшейіп, қазақстандық теннисші ауырсынуға қарамастан ойынды жалғастыруға мәжбүр болды.
Ақсап жүріп, ұпайлар арасында ракеткасына сүйенген Заңғар соңына дейін күресті. Оның жанкешті еңбегі ақталып, матч қазақстандық спортшының жеңісімен аяқталды.
Жартылай финалда Заңғар Нұрланұлы америкалық Китон Ханс пен Қытай Тайбэйінің өкілі Куан-Шу Чен жұбының жеңімпазымен кездеседі. Бұл матчта финал жолдамасы сарапқа салынады.
Айта кетейік, бұған дейін қазақстандық теннисшілер Анна Данилина мен Елена Рыбакина Australian Open турнирінің финалына жолдама алған болатын. Осылайша, Мельбурндегі жарыста Қазақстан теннисі тағы бір жарқын нәтижемен көзге түсіп отыр.
