Қазақстан Билли Джин Кинг кубогының ширек финалын жеңіліспен бастады
Қазақстан әйелдер құрамасы Қытайдың Шэньчжэньде Билли Джин Кинг кубогының ширек финалында Испаниямен кездесуді сәтсіз бастады.
Соня Жиенбаева алғашқы матчта жеңілді
Ширек финалдық кездесудің алғашқы ойынында әлемдік рейтингте 384-орында тұрған Соня Жиенбаева WTA рейтингінің 93-сатысындағы Джессика Бузас Манейромен кортқа шықты. Бірінші сетте испаниялық теннисші Жиенбаеваның екі доп беру геймін өз пайдасына шешіп, партияны 6:2 есебімен аяқтады.
Екінші партияда да Бузас Манейро басым ойынын жалғастырды. Ол тағы екі брейк жасап, матчты екі сетте жеңіспен аяқтады.
Айта кетейік, бұл Жиенбаева мен Бузас Манейроның кәсіби мансабындағы алғашқы өзара кездесуі болды.
Путинцева Қазақстанды жарыста қалдыруға тырысады
Келесі жекелей кездесуде Қазақстан атынан Юлия Путинцева кортқа шығады. Оның қарсыласы – Кристина Букша. Егер Путинцева жеңіске жетіп, жалпы есепті теңестірсе, жартылай финал жолдамасының тағдыры жұптық кездесуде шешіледі.
Жоспар бойынша жұптық матчта Жібек Құламбаева / Анна Данилина – Кристина Букша / Сара Соррибес-Тормо кездесуі мүмкін.
Қазақстан мен Испания арасындағы ширек финалдық бәсекенің жеңімпазы Билли Джин Кинг кубогының жартылай финалында Чехия құрамасымен кездеседі.
Чехиялық теннисшілер бұған дейін Ұлыбритания құрамасын жеңіп, келесі кезеңге жолдама алған.